Forsíða

Kunningarfundur á Hotel Føroyum tann 19. oktober 2011

Tað møttu um 60 fólk upp til fundin, sum er væl minni enn tað vanliga plaga at verða til kunningarfundir hjá okkum. Óivað var veðrið orsøkin til vánaliga uppmøting, tí henda sama dag, var á fyrsta sinni frost og gler á vegnum.

Formaðurin bjóðaði vælkomin og presenteraði donsku gestirnar, Lis Larsen, formaður í Thyreoidea Landsforeningen í Danmark, og Steen Bonnema, yvirlækni á Endokrinologisk deild á Odense Universitetshospital.

Lis Larsen segði, at hetta var hennara 4. vitjan í Føroyum og kanska eisini seinastu ferð, tí hon nú eftir 15 ár, sum formaður fyri felagið, ikki ætlaði at stilla upp aftur.

Heiti á fyrilestrinum hjá Steen Bonnemas var: ‘Thyreoidea-sygdomme’. Steen Bonnema, hereftir SB, gjøgnumgekk væl og grundiga sjúkueyðkenni á og viðgerð av teimum ymsu stoffskiftissjúkunum. Tær nógvu og týdningarmiklu upplýsingarnar blivu væl undirbygdar og kunnaðar til luttakarnar við orðum, myndum og grafik frá power point framløguni hjá læknanum.

SB byrjaði við at fortelja, at ein skjoldbruskkertil normalt vigar 15-20 g. SB vísti á, at stoffskiftiskertilin er ein lítil kertil við sórari ávirkan, tí at allar kyknir í kroppinum verða ávirkaðar av stoffskiftinum. Man sigur, at tveir triðingar av øllum stoffskiftissjúkum eru arvaðar, og at kvinnur hava 4-5 ferðir størri møguleika fyri at fáa stoffskiftissjúku enn menn.

Frá ár 2000 hevur man í Danmark tilsett jod í salti fyri at bøta um trupuleikan við, at tað í Danmark eru so nógv fólk við ov høgum stoffskifti. Í Føroyum eru tað mótsatt, flest av okkum hava ov lágt stoffskifti.

SB vísti á kanningar í Ålborg og Keypmannahavn hava víst, at tað eru umleið 9% av fólkinum, sum hava stoffskiftissjúku, uttan at vita av hesum. At Grave’s sjúkan er tann sjúkan har stoffskifti blívur hægst, og at myxødem er tann mest útbreidda autoimmuna sjúkan. Tá immunsystemið reagerar móti nøkrum í okkum sjálvi, tá kallar man hetta ein autoimmun sjúka. Immunsystemið traðkar vanliga til fyri at berjast ímóti bakterium, virus, svamp og aðrar sjúkur.

SB fortaldi hvussu man eigur at kanna tær ymsu stoffskiftissjúkurnar. Man eigur altíð við mistanka um sjúkuna, at fáa mált TSH, sum er eitt hypofysehormon, sum kann samanberast við termostat í kroppinum. Normalumráðið fyri TSH er frá uml. 0,3 til 4,0. SB legði dent á, at tað helst skulu verða 3-5 vikur millum stoffskiftisblóðroyndir eftir ávirkan av medisin, tá royndir við stuttum millumrúmi vilja verða missvísandi, tí tað tekur umleið ein mánað, til úrslitið av medisini virkar, hetta er eisini galdandi tá skampturin broytist (dosisændring).

Eftir framløguna (kann takast niður her) hjá læknanum vóru tað mong ið fingu møguleikan fyri at tosa við læknan og við Lis um teirra sjúku.

Vit í føroyska felagnum vilja takka Lis mangar ferðir fyri hennara stóru hjálp, samstarv og stuðul vit fingu tá vit settu okkara felag á stovn.